極潤無水油霜

如果大家有留意詩家嘅FB專頁會見到詩家做左一款乳香油霜俾屋企嘅人乾用，人乾用完呢幾晚終於可以一晚瞓天光，而乾燥敏感嘅地方都好返八成，詩家都收到有朋友問有冇得賣架，其實呢隻油霜嘅材料同做法真係非常簡單，如果有興趣嘅朋友仔可以跟住一齊做

成品50g

工具：電動打蛋器、不銹鋼杯/盆（需要可加熱同唔容易打爛嘅容器）

材料：甜杏仁油 25g，乳木果脂 25g

做法：

1）將甜杏仁油同乳木果脂加熱溶化混合好，稍為放涼放入雪櫃大約6-8小時，待油脂凝固後取出，詩家通常雪一晚，第二朝先攞出打

2）油脂取出後用電動打蛋器打發

3）油脂會逐漸變成忌廉狀，可加入數滴精油作調香及維他命E作抗氧化

打到忌廉狀就完成架啦～用個鐘意嘅容器裝好就可以啦，個容器記得事先要消毒一下～

呢隻油霜隨時用都得，但最好嘅係沖完涼抺完身即刻搽左再著衫，因為皮膚表面仲有水份，再搽個油霜上去就可以鎖住水份達致最佳嘅保濕效果，呢個油霜真正全天然，而且因為無水，所以唔會咁易壞，不過都建議大家最好都係少量製造同盡快用完，仲有記得存放陰涼乾爽嘅地方呀！